Изминативе два дена, 13 и 14 мај, преку Форумот „Култура за развој“, организиран од Хартефакт во соработка со Clubture, Kooperativa, Фондација за култура А25 и Euradia, Скопје стана средиште на уметници, културни работници, активисти и меѓународни културни мрежи од Северна Македонија, регионот и Европа.
Отворајќи го настанот, Сарах Малиќи, лидерка на тимот на Хартефакт во Северна Македонија, ја истакна важноста од создавање посилни врски помеѓу локалните независни културни чинители и европските културни мрежи, особено во време кога долгорочната поддршка за културата е сè поограничена. Таа нагласи дека општествено ангажираната уметност и независната култура имаат важна улога во градењето поинклузивни, поотпорни и поповрзани општества
Настанот беше отворен и од г-ѓа Михал Харари, Заменик вршител на должност при Амбасадата на Швајцарија во Северна Македонија, чија поддршка овозможи реализација на форумот. Обраќајќи им се на присутните, таа ја потенцираше важноста на поддршката за активна и видлива независна културна сцена во Северна Македонија и за зајакнување на врските помеѓу локалните културни актери и Европа. Таа истакна: „Културата и уметничкото изразување се суштински делови од демократските и отворени општества, а се охрабрува и посилна соработка и заедничко застапување во рамки на секторот.“
Настанот се одржа во два значајни простори за локалната независна културна сцена во Скопје: Киното на Железничка зграда и Младинскиот центар „Матично“, собирајќи повеќе од 50 учесници и говорници од Северна Македонија, Балканот и Европа. Заедно, тие создадоа простор за дискусија, размена и нови соработки во рамки на независниот културен сектор. Разговорите се фокусираа на: уметничката слобода, јавните културни простори, условите за работа на уметниците и културните работници, одржливата поддршка за независната култура, како и посилната регионална и европска соработка.
За време на форумот, учесниците разговараа за тоа како да се создадат културни екосистеми кои се поодржливи, поповрзани и подостапни, особено за независните уметници и организации кои често работат во нестабилни услови. Говорниците споделија искуства од Северна Македонија, Балканот и различни европски земји, отворајќи дискусија за долгорочни културни политики, јавни простори за култура, меѓународно вмрежување и улогата на културата во општествениот развој.
Вториот ден беше посветен на меѓународната културна соработка и европските мрежи, обединувајќи претставници на организации како што се Culture Action Europe – CAE и Меѓународната мрежа за современи изведувачки уметности – IETM. Дискусиите ја истакнаа важноста од поврзување на локалните културни сцени со пошироките европски иницијативи и создавање можности за мобилност, споделување знаења, застапување и прекугранична соработка. Претставници на неколку западноевропски организации и мрежи исто така нагласија дека, во актуелниот општествен и политички контекст, Европа има многу да научи од отпорноста, солидарноста и способноста за прилагодување што континуирано ја покажуваат културните чинители низ Балканот.
Форумот покажа како меѓународната соработка може да ја зајакне независната културна сцена во Северна Македонија и да ја доближи до пошироките европски културни разговори, создавајќи нови можности за уметниците и културните работници од Северна Македонија, регионот и Европа да се поврзат и соработуваат.
Следните два дена ќе бидат посветени на продолжување на дијалогот за овие и сродни теми во рамките на South-East Satellite BEYOND настанот.
Оваа активност е поддржана во рамки на проектот „Култура за развој“ на Владата на Швајцарија, кој се имплементира од Хартефакт Фонд.
