Проектот „Култура за развој“ го објави Повикот за грантови за застапување (Advocacy Grants) со цел да ги поддржи независните културни организации во Република Северна Македонија во справувањето со итни политички предизвици и застапување за долгорочни подобрувања во културниот сектор. Целта на овој повик е да се поддржат иницијативи кои го зајакнуваат дијалогот со носителите на одлуки, ги мобилизираат заедниците и поттикнуваат меѓусекторска соработка, со што се подобруваат оперативните услови и финансиската одржливост на независната културна сцена.
Со финансирање на проекти кои се фокусираат на обезбедување пристап до функционални и долгорочни простори, застапување за посилна јавна поддршка и предвидливо финансирање, како и промовирање на споделување ресурси и секторска соработка, оваа грантова шема има за цел да им овозможи на независните културни организации и понатаму да ја играат клучна улога во поттикнувањето на културната разновидност, демократските вредности и општествената кохезија.
Информации за проектот „Култура за развој“
Проектот „Култура за развој“ е сеопфатна, долгорочна интервенција во областа на културата и уметноста во Република Северна Македонија. Оваа активност е поддржана преку проектот„Култура за развој“ на Владата на Швајцарија, а се имплементира од страна на Хратефакт Фонд од крајот на 2024 година до крајот на 2028 година. Проектот има за цел да придонесе за растот на уметноста и обликувањето на општествено-политичките норми, препознавајќи ја културата како витална алатка за поттикнување поотворено, демократско и меѓусебно поврзано општество.
Кој МОЖЕ да аплицира?
Грантовата шема за застапување е отворена за конзорциуми од најмалку две организации.
- Секој конзорциум треба да биде предводен од културна или уметничка организација која:
– Континуирано е активна во културната сфера најмалку три (3) години;
– Покажува цврст организациски капацитет. - Партнери во конзорциумот кои можат да бидат вклучени:
– Граѓански организации;
– Истражувачки институти и „think tanks“;
– Други правни лица активни во уметноста и културата (независни фондации, донации, друштва со ограничена одговорност и/или претприемачи). - Најмалку еден партнер во конзорциумот треба да има докажано искуство во застапување, со цел проектот да има силна експертиза во влијание врз политики и мобилизирање на засегнатите страни.
Апликантот треба да биде регистриран како правно лице во Централниот регистар на Република Северна Македонија.
Тематски приоритети
Овој повик поддржува проекти кои спроведуваат суштинско застапување, ја подигнуваат свеста за клучни прашања и активно соработуваат со носителите на одлуки, јавните културни институции и други засегнати страни.
Проектите треба да поттикнуваат соработка меѓу членовите на конзорциумот кои имаат различни искуства, географска застапеност и целни групи, со што ќе се зајакне легитимноста и влијанието на застапничките иницијативи.
Секој конзорциум може да комбинира активности за промоција на независната културна сцена во Северна Македонија. Апликациите треба да содржат краток План за застапување во кој ќе бидат наведени клучните чекори и методи, како и да имаат испланирано најмалку еден јавен застапувачки настан преку кој ќе ги споделат наодите и резултатите со засегнатите страни и пошироката заедница.
Износ на грантот
Вкупниот износ на грантот по организација е до 3,992,000 МКД, кој ќе биде распределен во текот на две години и седум месеци.
Како се аплицира?
Повеќе информации за повикот, процесот на аплицирање и сите неопходни обрасци за аплицирање може да најдете на нашата веб страница: Cultural Advocacy Projects Grants – Heartefact.
Документите за аплицирање се достапни само на англиски јазик!
Рок за аплицирање
Сите задолжителни документи за аплицирање треба да бидат поднесени на [email protected] најдоцна до 17 ноември 2025 година до 23:59 часот.
Доколку имате прашања, можете да не контактирате на: [email protected].