По завршувањето на процесот на селекција минатата година, проектот „Култура за развој“ со гордост соработува со пет клучни организации кои ја редефинираат културната сцена. Овие институционални грантови беа доделени за да се зајакне долгорочната одржливост на независната сцена, обезбедувајќи им на овие витални културни чинители ресурси кои им се потребни за создавање трајни општествени промени.
Институционалните грантови беа наменети за зајакнување на организациските, оперативните и финансиските капацитети на културните организации. Овие грантови овозможуваат долгорочна одржливост, подобрено управување и континуирано влијание во решавањето на важни општествени прашања, застапување за инклузивни политики и поттикнување на развојот на заедницата преку културата.
Во рамките на овој повик беа поддржани пет културни организации со вкупен износ од 23.460.000 МКД, со поддршка по организација која се движи помеѓу 4.080.000 МКД и 5.100.000 МКД. Иако организациите се со седиште во Скопје, нивните активности и влијание се протегаат и во други градови и рурални средини, вклучувајќи ги Струга, Прилеп, Крива Паланка, Битола, Тетово и Преспа, како и поширокиот регионален контекст.
Развојот поддржан со овие грантови беше наменет за зајакнување на организациите како внатрешно — преку подобрени процеси и работење, така и преку унапредување на нивната способност за ангажирање и позитивно влијание врз општеството. Поддршката е фокусирана на организациски развој, вклучувајќи стратешко планирање, развој на публика и финансиска одржливост. Истовремено, организациите продолжуваат да работат на своите основни програми кои опфаќаат теми како што се социјалната инклузија, унапредување на правата на маргинализираните групи, еколошката свест, децентрализацијата на културата, како и градењето социјален дијалог преку социјално ангажирана уметност.
Организации кои добија поддршка во рамките на овој повик се:
- Здружение на граѓани КОНТРАПУНКТ (Проект „Re-imagining Together – Critical Social Futures“): 5.100.000 МКД
- Центар за современи уметности – ЦСУ Скопје (Проект „Креативни заедници“): 4.080.000 МКД
- Тиииит! Инк. – Здружение за промоција на женската активност Скопје (Проект „ФЕМИНИСТИЧКА ПРАКСА“): 5.100.000 МКД
- Локомотива – Центар за нови иницијативи во уметноста и културата (Проект „Practicing a Research and Residence Environment“): 5.100.000 МКД
- Организација за уметност и наука ФАКУЛТЕТ ЗА РАБОТИ ШТО НЕ СЕ УЧАТ – ФРУ (Проект „FRU- BUILDING Institutional Strengthening and Long-Term Sustainability“): 4.080.000 МКД
Проектот „Култура за развој“ има за цел да придонесе за растот на уметноста и обликувањето на општествено-политичките норми, препознавајќи ја културата како витална алатка за поттикнување на поотворено, подемократско и меѓусебно поврзано општество. Првата фаза од проектот трае од крајот на 2024 до крајот на 2028 година. Истиот е поддржан од Владата на Швајцарија и имплементиран од Хартефакт Фонд.